Маи Ван Фан – Mai Văn Phấn

Превод од виетнамски на англиски: Nhat-Lang Le & Susan Blanshard

Превод од англиски на македонски: Даниела Андоновска-Трајковска

Проф. д-р Даниела Андоновска-Трајковска

ФОТОГРАФИИ, ОВОШЈЕ И СОНИШТА

Недоволно експонирани фотографии, брзо созреано овошје и соништа

кои ги губат своите крилја пред дождот, течат пополека спроти текот на сеќавањата.

Ветерот ги оддувува отворените утрински полиња, влегува набрзина во собите

полни со измешана прашина и светлина, ја брише потта од свежо искапените соништа.

Потеклото е во распонот на раката, кога се враќаш веќе си го поминал својот живот,

или

чекаш да се реинкарнираш во следниот живот.

Душите кои допрва ќе се реинкарнираат, посетуваат свети места, летаат бесцелно, а потоа се засолнуваат во фиксирано идолопоклонство.

Некој трча по соништата, овошјето и фотографиите за да си го врати тоа што го изгубил, за да ја почувствува секоја солза како се закашлува наназад и

да го види амалгамот на сечија сенка.

Тоa од кое потекнува сѐ, го има обновено просторот, а младата генерација трева се шири над старата почва. Душите стојат на нови агли отворајќи се кон други светла, и во стенкањето на свежата роса, се починуваат и тропаат на секоја самогласка.

Насекаде нови текови почнуваат да истекуваат во сеќавања, земајќи ги фотографиите, овошјето, соништата за сѐ да претворат во глас од минатата ноќ

Даниела Андоновска-Трајковска: Проф. д-р Даниела Андоновска-Трајковска е родена на 3.02.1979 година во Битола, Р. Македонија. Работи како универзитетски професор на Педагошки факултет-Битола на Универзитетот „Св. Климент Охридски“-Битола на група методички предмети меѓу кои Методика на наставата по македонски јазик, Методика на почетно читање и пишување, Методика на креативното пишување и Методика на критичка писменост. Пишува поезија, кратки раскази, есеи и критики, но и научни и стручни трудови од подрачјето Образование кои се објавени во референтни интернационални научни публикации. Член и коосновач е на Универзитетскиотлитературен клуб Дениција ПФБТ – УКЛО Битола и Центарот за литература, уметност, култура, ораторство и јазик на Педагошкиот факултет во Битола. Член е на Друштвото на писатели на Македонија (ДПМ), Битолскиот книжевен круг (БКК) и Македонското научно друштво Битола (МНД). Претседател е на Уредувачкиот совет на МНД, Комисијата за издавачка дејност на Педагошкиот факултет-Битола, а уредник е на списанието за култура – литература, драмска уметност, филм и издаваштво Современи дијалози (МНД) и на списанието за литература Раст во издаваштво на Битолскиот книжевен круг. Ги има објавено следниве книги поезија: „Збор за зборот“ (со Златко Жоглев и Гордана Стојаноска, Матица македонска, Скопје, 2014), „Поема за маргините“ (со Гордана Стојаноска, изд. Македонско научно друштво, Битола, 2015), „Црна точка“ (изд. Битолски книжевен круг, Битола, 2017), „Стапалки“ (изд. Македонско научно друштво-Битола, 2017), „Три“ (изд. Современост, Скопје, 2019). Во процес на објавување е и поетската збирка со наслов „Куќа на контрасти“.Застапена е во домашни и странски литературни списанија и публикации, а учествува и на домашни и на странски литературни манифестации. Добитник е на меѓународна награда од Носиде, Италија (2011), награда за најдобра необјавена песна од Друштвото на писатели на Македонија на манифестацијата „Празник на липите“ 2018, втора награда на Караманови средби 2018 и наградата „Крсте Чачански“ за најдобра необјавена збирка раскази во 2019 со наслов „Кафе чај и црвено небо“.

Мај Ван Фан (Mai Văn Phấn)е виетнамски поет роден во 1955 во Нин Бин (Ninh Bình), на делтата на Црвената Река во Северен Виетнам. Живее и пишува поезија во Хај Фонг (Hải Phòng). Има добиено неколку национални книжевни награди, а има објавено 16 книги поезија, една книга со критики и есеи и 23 книги кои се објавени во странство. Поезијата на Мај Ван Фан е преведена на 33 јазици.